2009年7月31日星期五

狩獵開始 - Monster Hunter 3 tri~

等左咁耐,終於都出!!獵人生活再次展開!!一直以黎都係玩開PSP,家用機真係第一次.剛玩左陣,暫時個操控都叫幾易,加上今次連埋個黒手制一齊入,務求打得更得心應手!!




另外本Hunter Note,早前去北海道時已入手.全彩頁.簡單介紹莫加村設施,武器及各monster特性.好啦!!唔寫住喇!!我要去狩獵魔物啦!!!



2009年7月30日星期四

阿女&表姐試花裙

舅父即將於9月成家立室,倆表姐妹都有任務在身,阿女做花女,表姐就做姐妹.早兩日舅父,未來舅母就約埋倆表姐妹試花女裙,阿女試左兩件,第一件同表姐同一個款.但覺得普通左D.




再試第二件,婆婆話呢件靚,所以就揀左呢件喇!!



表姐就試多兩件,最後終於揀到件黄色,岩哂佢!!




2009年7月28日星期二

阿女@夏日孩子戲

今年阿女參加學校既暑期活動 - 夏日孩子戲.經過一個星期既綵排,尋日終於表演!!



個話劇名叫尋寶之旅,一共有七位三年級既同學仔一齊演出!!





表演順利完成!!仲攞到個最佳合作奬,由資深戲劇導師鄭國偉先生頒獎添!!





2009年7月26日星期日

阿女&表姐@書展2009

書展又黎囉!!少不免要帶阿女同表姐入去啦!!今日完全唔洗排隊就入到場,不過入到去都幾多人吓!!對呢兩個小朋友黎講,場内既書(由其係低能系列)同精品當然非常吸引啦!!所以都買左少少野,而且行左差不多成三個鐘,對地黎講已經係一個極限喇!







2009年7月25日星期六

意外禮物 - iPod touch


尋日公司Annual Party,係抽獎環節中第一個就抽到我,獎品當然cheap,得支蠔油,紅酒加600蚊,真黒仔!!抽完獎後就同Helen傾計,話你抽到部iPod touch,係最貴份禮物!!誰不知Helen話 :「我有喇!!都唔知要黎做乜??」我打趣咁話 :「咁俾左我啦!!」點知佢真係二話不説俾左我,我話俾返錢佢又話唔要!!就係咁,我就意外地擁有第一部Apple産品 - iPod touch,真係多謝哂!!


2009年7月23日星期四

北海道之旅番外篇 – 尋找狸小路的玩物店

係未正式同大家分享北海道之旅之前,先來個番外篇,介紹吓係札幌既玩物店.始終札幌唔及秋葉原集中,分佈都幾散吓!!所以未出發前已搜集各店舗位置及資料,務求爭取時間!!因為跟團關係,今次未能去到札幌站既Big Camera, Yodobashi Esta,只係行左條狸小路,而且只得兩個半鐘行,所以真係幾趕吓!!


先介紹位於狸小路三丁目既「激安の殿堂 - 唐吉訶德,(http://www.donki.com/c/shop/shop.php?lang=&shopid=47) 5/FGeo,主要係賣game, DVD, CD為主.



現時最Hit一定係發售緊既「Dragon Quest IX」及黎緊既「Monster Hunter 3,差不多全店都係地既蹤影.我都攞左DMonster Hunter 3」既宣傳單張,而係3/F就有一小小既玩具賣,不過唔多新品,而且價錢會貴過香港,GX-45便要25,000,所以好快行完.







跟住過對面馬路,黎到狸小路四丁目既COSMO,同樣係5/Fmandarake」(http://www.mandarake.co.jp/index2.html)主要賣中古及二手野,包括玩具,精品,漫畫,DVDCD等...我就當然係集中睇玩具喇!!如果真係買中古玩具,唔平既,好似日版老變咁,好多都要幾萬円先有交易….至於其他比較新款既,就真係幾平,好似MOSPEADA, CM’s紫色果盒不用4,000, MegaHouse黒白限定亦不過5,000!!仲有好多平野,真係不能盡録...



係櫃入面果盒神聖衣Original Color ,係新品,有埋紙皮盒,12,600,我真係掙扎左好耐,最終都係買到...原因係知道魂shop香港店將會開,所以想寄望到時可能有得賣兼平D!!



至於另一個櫃入面果盒ARX-7,同樣係新品,已經俾我俘虜左返香港!!大家估吓幾多錢??開估!!9,425,兌返港紙7佰幾蚊,係咪好平呢!!



其實呢間店係札幌係算係多野睇,有心尋寶既朋友,話唔定真係執到荀野架!!



跟住行去狸小路一丁目,過大約兩個街口,有幢名為「丸大ビル」既大厦,門口頗為細,認住「animate」個招牌就得架喇!!



呢度可以話係扎幌市入面動漫精品及漫畫既集中地,樓分三層.地庫記得有兩間舖,分別係賣同人誌及PC game.



1/F 全層就係animate(http://www.animate.co.jp/shop/shop_east/sapporo/),同香港既宇宙船唔一樣,日本既animate主要集中賣精品,漫畫及畫集,玩具反而好少.





而家最Hit一定係「ヱヴァンゲリヲン新劇場版:破」, 我就買左條電話繩喇!!另外K-on同黒執事都好hit!!



未去之前原先諗住可以狂買天元突破既精品,點知淨得返D file, Macross Frontier既精品亦不多,真係有少少失望...



2/F記錯有五間舖,三間賣漫畫及同人誌,一間賣中古game,最後果間賣cosplay服飾.




最後介紹埋係「丸大ビル」隔離既toranoana(http://www.toranoana.jp/),一樣係賣漫畫及同人誌.另外隔離有一間大型書屋,估計可能係租書店.




大致上狸小路可以行既動漫及玩具店,自己搵到既係咁多!!其實仲有其它地方如:post hobby(http://www.posthobby.co.jp/index.html), Yellow Submarine(http://www.yellowsubmarine.co.jp/shop/shop-003.htm).自己真係希望時間!!希望呢篇blog可以幫到有機會去狸小路,同對玩物有興趣既朋友啦!!


2009年7月21日星期二

返黎啦!!返黎啦!!


我地返黎啦!!尋日大約淩晨一點返到黎香港...(至於點解咁夜先到,遲D再同大家詳談!!)今次先分享第一件手信,就係北海道特産,只係六至八月先有得食既 - 夕張蜜瓜!!真係超甜超多水,我地用個匙,好似食雪糕咁食,好好味!!Yummy!!




2009年7月14日星期二

準備出發!!北海道之旅!!


又到左我地毎年去一次旅行既大日子喇!!今次既目的地係北海道,聽日出發,之前未去過架!!所以真係好期待!!睇過果邊D天氣,都有一兩日係落雨….希望到時會好天啦!!到下星期返黎,再同大家分享北海道既所見所聞啦!!


2009年7月12日星期日

阿女&表姐@新都會廣場

連續兩個星期日都落雨,今日終於都陽光普照,可以去街街啦!!先黎睇返個早場軍曹大電影4之翻兜侏羅紀,OK好睇架!!下晝就去Club House游水消消暑,夜晩再去新都會廣場食野!!果度搞緊個「北海道夏之祭」,原本消費滿200蚊只可以免費換一杯雪糕食,但個好人姐姐仲送多杯俾阿女同表姐食添!!Lucky!!至於D薫衣草,sorry,係假既!!





天元突破 一番賞 F賞 - 西蒙


4,純擺設,出奇地竟和Konami隻螺巖十分配合.


Packing



西蒙 - 在地下世界的部落「基哈村」長大的少年,七歲時由於地震而喪失雙親.性格軟弱,但擁有冷靜看清狀況的判斷力.常帶著具照明功能的護目鏡的西蒙,一邊為擴張基哈村而持續挖穴的工作,一邊尋找深埋地底的新奇事物作為生活意義.過人的鑽洞技術與手工藝資質確實連村民也予以認同,不過卻不獲同齡的年輕人理解,並被冠上「鑽洞西蒙」的渾號.某日,西蒙一如以往在發掘新奇事物的時候,發現鑽頭型的鑰匙 - 空心鑽.其後,在機緣巧合之下啟動了「裸,更以紅蓮團一員的身分跟隨卡米那在地上世界闖蕩.