反斗母親節

今日母親節,朝早當然係要同爺爺嫲嫲飲返餐茶慶祝先啦!!之後我同阿女就要飛甩Ava,跟住姑丈姑姐用年票個$150優惠入廸士尼玩!!

一入場我地就第一時間衝去「反斗奇兵大本營」玩降傘.等左大約40分鐘,係睇緊既時候,阿女以為好小兒科,點知一升上去個下離心力,已經嚇到鬼殺咁嘈,真係細膽到暈!!哈哈!!

之後我地就會合表妹,進行「貼紙收集大行動」!!中途去玩巴斯光年,畫米奇,睇3D同巡遊!!

阿妹真係好乖,全程都好乖坐係BB車,唔扭抱,又唔會扭計要落地玩,真係好抵得人錫!!

玩到接近六點至走,再出返旺角同爺爺嫲嫲食晩飯!!

P.S.係喎!!點解我地要飛甩Ava呢??其實應該係Ava飛我地先至啱!!咁係因為佢一早約好要同婆婆出席表姐上年去北京跳舞時攞奬既頒奬典禮,而又只得三張飛,我地先至要諗節目咋!!