久違了的太平清醮

話説自己最近一次入長洲都已是十多年前的事,記得小時候係阿媽帶住我地三兄妹弟去長洲睇太平清醮.今時今日,見阿女而家咁大個都未帶過佢去,一於今日趁熱鬧輪到自己帶老婆同阿女入去睇飄色!!

我地差唔多中午至去到中環碼頭,呢個時候已經少左好多人,所以可即刻上船,入到長洲已經兩點幾了.一出碼頭已經感覺到同以前比而家睇太平清醮真係熱鬧左好多,而且封左好多路,我地好難至行到過去啲舗頭度買串大粒魚蛋呀!!

咁晏入去都打定輸數未必睇到飄色,沿路行去北帝廟之際,警察突然話要封路俾巡遊過,竟然俾我地睇到飄色,位置仲好好添!!

睇完飄色食過下午茶後,就正式向北帝廟進發睇包山啦!!

睇過包山後就梗係要食平安包,排左半個鐘阿鬍鬚老細間包舖,一人一個唔同口味,求個一家平平安安啦!!跟住沿海旁買吓小飾物,再由黄昏排到天黒7點幾至上到船返出市區囉!!