深圳兩日遊下集

半夜阿女仍然唔舒服,起身嘔左兩次,搞到成晩唔係咁好訓!!朝早落酒店食返個豐富早餐(包埋兩個大人,兩個細既就計一個大人錢,人仔$170)跟手就check out!住一晩五星級酒店只需 $170,抵!!

之後我地就搭地鐵去「世界之窗」.對上一次已經係十幾廿年前,果時仲係同Ava拍拖,而家舊地重遊就拖住兩個細既一齊去囉!!估唔到而家入場費都幾貴,大人$140,細路就半價.

入到場阿女一見架單軌火車就話要搭,原來入面樣樣玩意都要另外俾錢,真係離譜!!

之後就周圍行吓影吓相,去玩草地迷宮,行到四點度阿女又唔舒服,肚痛要搵厠所,所以就離場!! 阿女辨完大事後,出奇地成個人精神哂,冇嘔又開胃返哂,去KFC食左桶鷄後就搭車返酒店攞行李!!

最後再去老街東門行夜街,三個女人當然要shopping一大輪啦!!

諗住返羅湖丹桂軒食晩飯,點知好多人等位,所以最後我地返上水廣場,食完就返屋企囉!!