台北吃喝之旅2012@Day 2

8月11日

行程 : 中正紀念堂～台北至中正站地下街～淡水～美麗華摩天輪

報呢個團除左住得好同有得放天燈外,就係睇中左佢可以俾你自由行玩兼任搭捷運車飛一日!!Set左8點幾Morning Call,hea住起身食早餐,11點至離開酒店.

由酒店只需歩行五分鐘就到達南京東路站.

話哂第一次黎台灣,明知兩個細一定嗌悶,但點都要去一去其地標 - 中正紀念堂!!

雖然好猛太陽,但真係値得到此一遊!!比起中正紀念堂,自己鍾意旁邊嘅國家戲劇院及國家音樂廳多啲.

跟住就去台北地下街,佢地係度買野,我就俾舉行緊嘅街霸比賽吸引住!!

行到接近尾段,竟然發現多間玩具及Game舖,即時眼前一亮衝入去,睇下有冇正野...點知啲價貴到冇譜,睇左兩三間都冇心機繼續睇落去,走人!!(所以幾時都話香港買玩物野平,如果唔炒嘅話...)

條地下街由台北至中正站都幾長,要仔細咁行真係一日都唔夠,我地走馬看花咁都行左三粒幾鐘,行到攰就過去新光三越食lunch.

完成台北至中正站地下街行程,出發搭到去尾站:淡水,車程都幾長吓,接近一粒鐘!!咁長車程係度做乜,梗係眠一眠抖一抖啦!!

一出車站,跟住途人行好易就會去到淡水老街!!

一入老街,兩個細嘅已經飛撲去街口間長長軟雪糕店開餐!!

淡水有好多獨特風味小吃,如:阿給,魚丸,燒魷魚等,又有手信買,條海旁長廊又行得舒服.

豪大雞排雖然香港都有得食,但點都要試下正宗出品,不過話時話,正宗真係好味啲,而且平香港足足一倍價錢!!另外最正係佢旁邊間飲品店,可以無限refill 架!!

可惜嘅係天色灰暗,一邊行仲聽到行雷聲,睇唔到出名嘅淡水咸蛋黄之餘,仲開始落雨,仲越落越大...我地亦只好速速離開.

原本諗住行完淡水就去士林,但因唔夠時間加上落雨,所以決定飛站直接搭去劍南站!!車程好長,但呢個景點係大女指定,所以一定要去!!而呢個景點就係:美麗華摩天輪!!

好好彩黎到已經停左雨,即刻上平台買飛.入場費毎位$200台幣,我地特登等透明車箱坐(得一卡,等左成半個鐘),兩個細嘅又要驚又要坐,搖少少已經鬼殺咁嘈,全程17分鐘就係嘈喧巴閉中渡過XD.

玩完個摩天輪已經成十點幾,週圍食店已經關哂門,得返間Burger King可以揀,真係冇諗過黎到台灣都要食漢堡包...

由美麗華返酒店好近,兩個站就到,返到酒店撻落床又係成點鐘,第二日行程就此終束!!