台北吃喝之旅2012@Day4

8月13日

行程 : 西門町～韓國明星官方專賣店～伍角船板主題餐廳～貔貅館～台北宜蘭機場～返香港

今日係台北之旅最後一日,原定個團朝早係去故宮同靈芝店,但兩個細嚷住話要去搵韓國明星官方專賣店,所以我地決定離團食lunch時間至join返.

未搵之前,我地先返去西門町,目的係去老天祿睇吓有冇鴨舌賣.Yeah!!果然真係有得賣,一口氣買左三盒作手信,再買多包豬脚根食.之後就到女人買護膚品,大滿足!!

跟住就重要啦,要搵韓國明星官方專賣店!!上網search過係許昌街五大唱片樓上,即係台北車站附近,到車站後搵啱出口,原來就係新光三越後面,兩個見到個招牌已經興奮到不得了!!

上到去就更加開心到飛起!!雖然係禁止攝影,不過都偸影左幾張,另外好多相都賣哂,不過兩個一樣大出血!!

間舗好細,但都逗留左成個鐘.之後就搭去劍南站,去食lunch間伍角船板主題餐廳會合各團友.問返啲團友故宮同靈芝店多唔多野睇,佢地都話好多大陸人迫唔到埋去睇喎!!(好彩離團ja!!)

今餐係團包嘅最後一餐,亦係最好食一餐.至於所謂伍角船板主題,就真係睇黎睇去都唔知個主題講乜,淨係覺得間餐廳好大好黒!!

食飽飽去埋最後一站:貔貅館,講完一大輪姓名學同幫你測吓個名外,咪又係sell野!!

終於都要去台北宜蘭機場,寄好行李(三個行李箱各有一半係手信,再加多兩個大箱!!)過埋關都係五點鐘.

見有剩時間特登行去長榮個Hello Kitty候機室同望吓架飛機.

臨尾食多次牛肉麵,雖然都好味,但都係九份正啲!!

班機七點半起飛,飛機餐又係得份三文治(好彩食左碗牛肉麵打底)九點幾就返到香港喇!!

後記:好多人話去台北玩同係香港玩差唔多,咁又係喎!!繁體字識睇.溝通又唔大問題.而且週圍都見到香港人.感覺真係唔似去左第二個國家.不過下次再去台北玩(因為仲有好多地方未去),一定會揀自由行,見啲人包架7人車連司機就車你去週圍玩,好鬼方便架!!