7月19日
行程 : 白之戀人博物館 ~ 千歳Outlet ~ 札幌新千歳機場 ~ 台灣桃園機場 ~ 香港機場
黎到最後一日,成日都不停咁落著雨,好彩今日去既地方唔算多,不過都難免有少少掃慶!!而今日既第一站係 - 白之戀人博物館.
白之戀人有幾出名,相信唔洗多介紹!!至於呢間博物館,日本人真係識包裝,内裏毎個角落都裝潢華麗,真係睇唔出佢原本係一間工場黎!!
同場仲有懐舊玩具展覧,岩哂我口胃!!
因為之前係狸小路已經買左白之戀人,所以係度淨係買左罐朱古力飲,都幾甜吓!!其實外出既環境好靚架,可惜落緊大雨,搞到影唔到相,唉….
離開白之戀人,到達最後一個景點 - 千歳Outlet,故名思義即係Shopping Mall.四個女人有得shopping,當然唔會放過呢個最後機會啦!!
至於我就負責去搵位食野,今餐要自費!!既然黎左四日都未食過壽司,咁岩係千歳Outlet有一間回轉壽司魚一心,一於今日食盡佢!!呢間D壽司價錢同香港差唔多,特別欣賞佢個鰻魚,睇阿女個樣就知好好味!!
食飽飽後就要去機場囉!!係辨緊寄行李既時間突然聽到有個女人講話班機好似delay(因當日香港果邊打風,半夜仲掛九號波添!!),但機場内既航班顯示正常,咁大家咪照入閘囉!!
我地大約未夠4點入閘,原定班機16:40pm起飛,但望出停機坪竟然冇飛機停係度,等到起飛時間過哂,就連機尾都見唔到,問D職員又淨係答唔知唔清楚!!終於過多半個鐘,先至有廣播話班機因機件故障,要緊急降落福岡,而且要delay三個鐘!!(咁即係之前未入閘前聽到果番話係真架啦!!)一聽到呢個消息,全候機室即時怨聲載道,問明知班機係delay,點解唔早D通知!!班職員就不停咁講sorry,又話可以用機票到小食部免費攞一樣野飲,以求平息民怨!!其實今次國泰安排得真係好差,班機係三點鐘已轉飛去福岡,照計應該有哂充足時間通知北海道呢邊,真係唔知係咪有心隠瞞呢!!
係個細小既候機室呆等左三個鐘,班機終於係七點降落千歳機場,跟住又有廣播話:「因為民航條例,機組人員已超越其工作時間,需要轉飛台灣更換工作人員!!」此言一出,候機室内即時群情洶湧,所有人均怒火衝天!!投訴聲始起彼落!!但都係冇辨法,淨係話返到香港,公司會有安排,所以最後幾乎全部人都係黒住面上飛機!!
坐左三個鐘頭機(其間睇左IRON MAN)到達桃園機場,等班機組人員交更再起飛.
終於返到香港要半夜一點鐘.至於所謂既公司安排,就只得三架巴士去港九新界三處地方,好多人都非常不滿,包括我地在内!!其間有一國泰職員話可以坐的士claim返數,咁我地當然係去搭啦!!結果兩點半先返到屋企,足足遲左六個鐘頭,真係黒仔!!
最後分享吓D戰利品.
後記 : 今次北海道之旅,不論食同住都非常滿意,講到食就更加係食到冇停口添!!另外要俾三個「最」for 今次旅行.最高興當然係睇到花田啦!!因為真係好靚!!最驚喜係睇到煙花,因為未試過係外地睇!!最黒仔係連續兩年去旅行坐飛機都delay,好彩尋晩終於收到國泰refund既的士錢,算係攞返個尾彩啦!!至於下次如果再有機會去北海道,可能會試吓自遊行,同埋揀冬天先去,欣賞白雪下既北海道!!
