北海道之旅2009 Day 2

7月16日

行程 : 登別地獄谷 ~ 登別伊達時代村 ~ 蟹御殿海鮮市場 ~ 熊牧場 ~ 洞爺湖

係酒店食完個早餐,(原來間酒店好近札幌JR,早知夜晩就去行陣啦!!)八點鐘就上旅遊巴出發去第一個景點 - 登別地獄谷.

今日天氣好好,一落車隨風便飄來一陣陣硫黄味,都唔算太臭既…呢個直徑有四百五十公尺既火山遺跡,一片黄澄澄,冒着白煙,景就真係一眼睇哂!!

近近地可以行落去拜吓薬師如來像.

呢隻熊話係真標本黎,不過都有D假喎!!

蓋返個印留念,算係到此一遊!!

逗留左大約45分鐘,我地就去第二個景點 - 登別伊達時代村.呢個以江戸時代作主題既公園,入面個環境幾好,建築又有特色,係影相既好景點!!

不過我地第一時間唔係去影相,而係玩入面間忍者屋同另外兩間鬼怪屋.阿女同表姐就一路拖住我,一路嗌到鬼殺咁嘈,真係我仲驚過佢地!!

玩完再去睇埋個忍者表演,雖然唔知講乜,但係都幾好笑!!

玩哂入面D設施,跟住梗係影相啦!!

今日都幾猛太陽,買支波子汽水消吓暑先!!

跟住就係午餐時間,呢度係差不多個個旅行團都會去既 - 蟹御殿海鮮市場!!

雖然明知呢度做旅客生意,個價錢一定貴,但一場黎到冇理由唔食豪D,所以都揀左隻雪場蟹加三隻帶子,加埋萬八円!!(中間果盤係包既.)

係就黎食完既時候,領隊教我地一個佢話係肥滔教既食法!!先撈起D渣淨返個湯,再加飯煲到好似糊仔咁,最後加隻蛋搞均佢,估唔到又真係幾好味喎!!

呢度個環境都唔錯架!!對住一望無際既海景食飯,真係好舒服!!

食飽飽就去下一個景點 - 熊牧場.

遠眺可以見到有珠火山.

呢度其實唔係好大,係俾大家餵吓熊人,睇吓佢地做D乜野動作黎引你俾野佢食(有隻就請請,有隻就成日打自己個肚),但又估唔到阿女同表姐都幾鍾意揸住包曲奇去餵喎!!

餵完熊人後,到我地餵返兩個小公主食蜜瓜雪糕!!

最後一個景點 - 洞爺湖.

而今晩住果間酒店萬世閣.亦係係呢度,間房對正個湖,超正!!

夜晩飯係酒店度食自助餐,表姐仲一口氣食五碗冷麵,勁!!

飯後仲有餘慶節目,就係睇煙花喇!!第一次係外地睇煙花,而且仲係舒舒服服咁睇,唔洗好似係尖沙咀咁同人迫,個感覺真係超良好!!最後返入酒店浸埋個露天温泉,第二日行程就此結束!!