北海道之旅2009 Day 1

今次係第一次去北海道,加上已經相隔兩年冇去日本,所以心情特別興奮!!而今次除左我地一家三口加埋表姐外,仲多左個神秘嘉賓,佢就係阿媽,即係嫲嫲喇!!我地報左東瀛遊,五日四夜,15號去,19號返.

7月15日

行程 : 香港機場 ~ 直航札幌新千歳機場 ~ 拉麵橫町 ~ 京王酒店

朝早7點半就要去到機場集合,今次個團有31人,算幾多人!!俾領隊搞好哂D手續,寄埋行李就入閘!!

阿女毎年一次入機場都要影返呢張相黎留念吓!!

班機9點40分出發,係大家樂食完個早餐,去埋洗手間,搞吓搞吓竟然搞到9點25分最後召集先至黎登機!!坐大約五個幾鐘頭機(期間睇左套春麗外傳,Ava就睇游龍戲鳳,仲睇到又喊又笑添!!),終於係當地時間大約3點30分到達札幌新千歳機場.

未出發時已睇天氣報告話第一日係落雨,果然好準!!而且都幾涼吓,得20度.攞完行李,諗住可以即時起程啦….點知等左成半個鐘架旅遊巴先黎,睇住其他團走哂,得返我地呢團等真係有少少慶慶地!!

經過一個鐘頭車程,終於黎到札幌市中心.領隊先教我地點由拉麵横町行去狸小路,好等我地食完拉麵可以去行一陣.因為間拉麵店都幾細吓,所以要分兩組人入去,我地係第一組,揀左味噌同麵豉湯底,再加多兩客餃子,超好味呀!!

食完麵就過去狸小路行左陣,未夠9點就返酒店.第一晩我地住京王,間房都OK大架!!之後落便利店買少少宵夜,就結束我地第一日行程喇!!