話説對上一次冬天時節去旅行已經係十多年前美國+韓國的Honeymoon之旅,自從阿女出現後,幾乎毎次旅行都係暑假,一來怕佢細個易冷親,二來上左小學聖誕假後就要考試,根本冇可能去玩.過左六年嘅寒暑,阿女終於上中學,而考試時期就改左放聖誕假前,Yeah!!終於可解除『聖誕閉關期』喇!!所以雖然暑假然已去台灣玩,但都想冬天出去玩玩,咁冬天去旅行,就梗係要去有雪嘅地方,而係Ava「反日」嘅意見之下,我地就去首爾玩雪喇!!
2012年12月28-29日
行程 : 香港機場～仁川國際機場～青瓦台～南山韓屋村～東大門～DIY餅乾小屋～Mayfair小木屋
衆所周知去首爾多數搭零晨機,所以28號當日我仲要返工,Ava同阿女佢地兩個就留係屋企執行李.今次我地報左新華旅遊,夜晩十點半會合領隊,搞好哂啲手續同寄埋行李兼食埋個宵夜就上機!!
班機12:55am起飛,坐嘅係大韓A380空中巴士,第一次坐A380,坐感覺幾舒服,座位唔會好窄,電視係touch screen,坐大約四個鐘,訓唔著通頂下5點幾到達仁川國際機場!!
落機後第一件事就係兌換韓幣,當日個RATE 136,OK啦!!跟住都要係機場等段時間旅遊巴至黎,咁食個早餐啦!!而全球最大衆化嘅,就梗係麥記啦!!
等到約7點旅遊巴終於到,離開機場室内一出門口即感受零下氣温的陣陣寒風!!今次個團有廿幾人,唔算多唔算少,而且小朋友較多,佔差不多一半.基本上個個一上旅遊巴就訓,所以對第一個景點青瓦台,好多人都冇落車,得幾丁人落車到此一遊同去下廁所就走囉!!不過同四年前,呢度都修葺左唔少,好行左靚左!!
跟住就去南山韓屋村,見到周圍鋪滿雪,條河結哂冰,仲加埋有冰彫睇,即刻成個人醒哂!!
而車程中阿女突然成個人彈起,原來佢話見到間Tous Les Jours麵包店,心諗唔通阿女肚餓想食麵包,原來唔係,佢話間麵包店係佢偶像Super Junior開喎...咁咪同佢癲吓影完幾張相就行去搵啦!!其實呢間麵包店係首爾就好似7仔咁有好多分店,而所謂SJ 開嘅只係某一兩間而己...咁當然我地身處呢間唔係阿女偶像開啦!!白行囉!!返去韓屋村集合時,又再次幫襯門口間燒餅店,十多年來味道仍然不變!!
跟住就去首個shopping地點東大門,我地去到大概11點,啲舖頭剛剛開左少少,人流唔多,都算行得自在!!而除左買衫外,阿女仲有一個目標,就係K-Pop明星精品喇!!
行到中午時間,係返附近商場安排食人蔘鷄湯飯.
食飽飽去玩吓輕鬆親子活動:用餅乾整間屋仔,材料包哂,但其實都幾浪費吓,所以到頭來玩左陣都變相當下午茶咁食左落肚!!
跟住就開始長途車旅程,而外邊亦開始有陣陣飄雪,估唔到第一日黎到就見到落雪!!
兩個鐘頭車程,接近六點天都黒哂終於黎到今晩訓嘅地方:Mayfair小木屋.雖然天色已黒,但仍然睇到屋外鋪上厚厚積雪.而Mayfair小木屋樓高兩層,屋内裝修好有長洲度假屋feel.
我地放低啲行李,就去貌似室外嘅屋仔度,有幾個火爐,食韓式BBQ!!不過食物只得幾塊豬肉,根本唔夠喉!!好彩未入小木屋前導遊先車我地去便利店入定啲腸仔蟹柳,咁至岩岩好夠飽!!
食飽飽仲有餘慶節目,落住雪玩滴滴金都係第一次!!而因為小木屋附近係荒山野嶺冇夜街好行加上尋晩冇覺好訓,所以都好早返入屋!! 結束第一日行程了!!
嘩嘩！我都想去啊~
回覆刪除