8月24日
今次旅行咁多日都係住係呢一間酒店-Coop Residence.尋晩係車度導遊已經話酒店D房好細,但係估唔到真係細成咁囉!!個格局好似D度假屋咁,有電爐,微波爐,個電視仲要係15吋mon添!!所以Ava話唔會係間房度影相,因為真係太差喇!!
因為酒店無早餐食,所以就車左我地去間地道餐廳度食早餐.一落車我地兩公婆已經覺得好熟囗面,再入埋去已經即時啊左一聲!!因為我地黎過呢間餐廳,估唔到9年後竟然再黎一次,仲要連D裝修,食既野都無變過,一模一樣!!
食完個無野食既早餐後就出發去第一個景點 - 青瓦臺,亦即係韓國的總統府.
身後果座山名為北岳山,外貌似一個人樣.導遊話原本係一塊風水地,但日本人統治韓國時,特登炸左個鼻,又用木柱釘住隻眼,破人風水地!!
好大個太鼓啊!!
呢兩個人著哂成套單車裝咁,其實係差佬黎架!!
係青瓦臺個噴水池前影完相後,出發去第二個景點 – 位於南山公園的韓屋村.
9年前我地係冬天黎,身後個湖仲結埋冰架!!
有野玩呢兩個小朋友當然第一時間去玩啦!! 唔記得呢個遊戲個名堂喇!!淨係知抛中中間先有分囉!!
呢D瓦缸係用黎裝泡菜用架.
阿女食緊既係紅豆餅幾好食架!!
一路食住紅豆餅,好快又去到我地大人玩既地方 - 七樂賭場.講起呢度Ava就慘啦!!話説領隊會毎人派張coupon,張coupon加30000 won 籌碼可以換到一個火機的,咁我地有4張coupon,原本可以話免費換既,但Ava話玩吓啦!!結果…輸左60000 won ,對返港紙呢四個火機就要成四百幾蚊啦…唉!
輸左錢後就去食午餐,食既係石頭飯+任食火鍋.個石頭飯幾好食架!!加上阿女同表姐係第一次食,顯得特別興奮!!
食飽飽後就去行東大門!!果度D商場好似葵涌廣場.最特別之處係毎個商場都整個舞台,俾D韓國人上去表演!!
有成四百幾個站既地鐡路線圖,真係眼都花!!
呢隻雪條好好食架!!好有西瓜味,D核仲用朱古力整添!!
行完東大門後就去「會説話神奇藝術館」
聽個名好似好正,其實係睇電視囉.會館原本安排左個講普通話既工作人員一路行一路講解,但未到一半,我地成班人已經走散哂囉!!
呢幅蒙羅麗沙,你問佢野,佢識答你架!!不過係用韓語…
臨走時,又黎扮吓野先!!
今晩晩飯食人蔘燉雞湯,好好味啊!!
食完補野後,未夠九點就返酒店,終束第二日行程!!
沒有留言:
發佈留言