黎緊阿女開學升上六年級,面對呈分試將會十分緊張,所以有得玩好玩埋佢!!趁係暑假最後嘅一個星期日,約埋表姐同Ryan,一於入海洋公園玩盡佢!!(因為怕濕身,所以唔帶相機,全部相用iPhone影算.)
特價夜場都幾抵玩(大人$150,小童$75),所以都幾多人入場!!
一入到場就第一時間去搭纜車,出奇地唔洗等一去到就上到車!!
過黎呢邊主要就係要玩新野:「熱帶激流」!!之前做定research,知道會由頭濕到落脚,所以都做哂準備帶定雨褸去玩,但結果面,褲,鞋都係濕哂!!(除左濕之外,刺激度係零...)
因為濕濕地要搵地方吹乾個身,所以去玩摩天塔同飛天鞦韆,貪有冷氣同風乾,跟手再嘆埋杯雪糕,爽哂!!
拿拿聲即搭纜車返山脚(今次要等四五個字),呢個時候已接近九點,快歩趕去玩另一暑假限定活動「功夫熊貓夏水禮」!!先玩呢個泡泡池,再去水戰擂台鬥射!!終於三隻野由内到外totally let’s get wet!!,要換過哂所有衫至行得!!(一早準備好兩套衫呢!!)
餘下十分鐘時間,衝去睇埋新嘅海洋館!!人唔太多,未試過行得咁暢順舒服!!個新海洋館大過以前好多,但睇海洋生物嘅窗比以前少左,有少少失望.職員都算幾好,俾我地行到十點半至趕人走!!(原定十點閉館)
玩得四個半鐘係就係唔多夠喉,不過已玩哂想玩果幾樣野,都算滿足啦!!跟住我地坐小巴出銅鑼灣澳門茶餐廳醫肚,成十二點半攰到七彩至返到屋企呢!!
沒有留言:
發佈留言