新加坡自由行之旅2011@Day 1

今次係第一次去新加坡,起初都有諗過跟團,但同阿妹傾開計知道佢地都會去新加坡玩,既然大家都有共同目的地,於是就一齊相約自由行啦!!(好彩有阿妹幫手搞掂哂book酒店同行程,唔係都唔知去邊度玩囉!!Thanks!!)

8月17日

行程 : 香港機場～直航新加坡樟宜機場～聖淘沙Resort World Sentosa～Vivo City

六點晨吉咁早約埋係屋企樓下等就去搭機鐵,未夠七點已經搞好哂啲手續,寄埋行李入埋閘!!

入到閘就梗係嘆返個早餐啦!!平時幫襯開嘅大家樂而家轉咗做翠華,同出面比最唔好食係個奶油豬,都唔脆嘅!!見食完仲有時間,兩表姐妹就梗係去做吓熱身運動先啦!!

班機原定8點55分出發,最後都delay到9點35分至起飛.

睇吓!!鬆馳熊顯靈啊!!

唔知CX係咪cut cost,以前見細路就派嘅小禮物,而家6歳以上一律唔俾!!(問左幾次至有個空姐肯俾阿女...)期間我睇左套Thor,Ava就睇B+偵探,仲驚到要用件衫遮住個頭添!至於阿女唔洗問梗係打機啦!!另外好好笑係Ava同阿女毎次飛機降落都一定耳仔痛,所以一定要嚼香口膠,但新加坡唔俾入境,所以我地落機前要食哂成包!!坐大約三個幾鐘頭機,終於係當地時間大約1點幾到達新加坡樟宜機場.

過關同攞行李都唔洗點等,阿妹搞掂出埋張電話咭就坐的士去酒店!!頭兩晩我地都會住係聖淘沙Resort World Sentosa,俾張voucher的士司機睇就可以免入島費啦!!

Resort World Sentosa有六間酒店,我地揀左Hard Rock Hotel,黒漆漆嘅lobby,中間有個酒吧,望出去就係個人造沙灘泳池,好有渡假feel!!

好喇!!過黎睇吓示範單位先!!阿妹住Double Room,我地就Twin Room,仲特登揀埋兩間房可以打通!!間房都算ok大,好好彩我地揀到間窗外泳池景既房,個感覺真係超良好!!唯獨係個浴室細咗啲,竟然連浴缸都冇!!

兩個細路一入房,就梗係要測試吓張床既彈性如何啦!!

執拾好後要去醫肚先!!係酒店歩行約五分鐘就可以見到單軌火車Sentosa Express,坐一個站唔洗三分鐘就到達Sentosa Station!!

一出站就係Vivo City位於三樓嘅Foods Republic,都幾多地道嘢食架!!搵好位就正式開我地新加坡嘅第一餐下午茶!!

雖然係下午茶,但都食咗好多嘢!!有潮洲魚圓粿條麵嘅魚圓湯(S$4.50),魚旦好爽口!!發發燒烤雞翼(1只S$1.30,至少要買3只),再加多杯Toast Box奶茶,飽哂!!

醫好個肚返酒店,玩兩個細路期待以久嘅第一個節目 - 酒店沙灘泳池!!

玩到六點幾,水開始冷,係時候要上水食晩餐!!返去Vivo City,先行超級市場入定宵夜貨先!!除左杯麵外,梗係要有呢度既特産五色益力多啦!!

晏晝食下午茶已book定位,晩餐食位於三樓嘅「無招牌海鮮」!!我地一共叫咗五味餸,包括有:

沙律油條 - 油炸鬼上面加芝麻,入面饟入魚肉,好味!!

星州米唔辣啱哂小朋友食!!

蜜汁雞 - 同時有蜜汁甜味及醋酸味,開胃一流!!

麥皮蝦 - 外皮香脆,麥皮香囗,正!!

最後到主菜白胡椒蟹,我地揀咗澳洲白雪蟹,胡椒味好重好野味,而且都算幾多肉!!不過都幾甘呀!!成$150/kg!!淨係呢碟蟹都接近港幣$2000,成個trip最貴呢餐啦!!咁黎得旅行梗係要試吓新野,食吓好野啦!!所以大家都好滿足呢!!

食飽飽都差唔多喇!!返酒店囉!!