新加坡自由行之旅2011@Day 3

8月19日

行程 : Merlion Tower～Siloso Beach ～Palawan Beach～出市區酒店～烏節路～魚尾獅像～老巴刹

食完個早餐準備check out,咁啱呢日泳池要做Maintenance,我地都算走得及時!!

兩個細路啱啱食飽冇耐又話要買糖食!!呢間叫Candylicious好多糖賣,揀咗呢款可以自己加添不同味嘅糖粉,原本諗住買細細支S$3果隻,點知個收銀話冇,要買而家S$5 size,但轉個頭到個鬼佬買又有返,真係可惡!!

坐單軌火車喺imbiah station落.抬頭一看就會見到坐落於聖淘沙嘅魚尾獅像:Merlion Tower!!

呢個魚尾獅像個樣都幾惡幾吓!!

既然叫得做Tower,即係可以上去啦!(大人S$8,小童S$5)入面有介紹魚尾獅嘅歴史,許願像同埋搭lift上獅囗影相睇景!!

周圍仲有公園行架!

離開魚尾獅又坐一個站到beach station.呢處分開咗兩邊沙灘,要分兩架接駁巴士.

我地先去左Siloso Beach,呢邊個沙灘比較大.

除左游水外,仲有其他野玩架!!所以齋黎聖淘沙渡假幾日都大把嘢玩架!!

轉車過去另一個沙灘Palawan Beach灘.呢度水清沙幼,環境清幽,所以就算好猛太陽,兩個小朋友都係忍唔住要落水玩一陣!!

附近仲有條吊橋,可以行過去對面個島同上塔頂,睇哂成個沙灘嘅風景架!!

隨住呢個沙灘之旅,我地亦要離開聖淘沙返Hard Rock Hotel攞返啲行李,就坐的士出市區,轉去Carlton Hotel!!

又黎睇示範單位,房同浴室都算大,而且有浴缸,阿女終於可以玩浸浴!!

酒店位置就喺正Raffles Hotel對面,隣近MRT City Hall 站,交通好方便!!

要去搵嘢食啦!!去開新加坡嘅朋友,都應該知道呢頭附近有間老字號海南雞店.冇錯!!就係逸群雞飯餐室!!内裏冇華麗嘅裝修,只有一班老員工及慕名而黎嘅食客!!

我地叫咗海南雞同燒肉(Total S$24.80),相比起雞,碟燒肉更有驚喜!!

之後我地就坐MRT,行出名嘅購物大道:烏節路.

行到脚仔攰,就落左Foods Court食亞坤咖央多同街邊雪糕車賣嘅雪糕三文治,Yummy!!

離開烏節路坐MRT去另一個站Raffles Place,一出站個感覺好中環feel!!

歩行約5至10分鐘到達海旁,望過對面就係而家最出名嘅金沙酒店啦!!

沿海旁行好快就黎到目的地:魚尾獅像!!黎到時已接近黄昏,啲靚位俾哂班攝影團霸哂囉!!

阿女未黎前已經話要影幾張惡搞相,睇吓,幾搞笑!!

入夜後又有另一番味道!!

夜晩同阿妹分開食.我地去咗出名大排檔區:老巴刹.可以坐室内或馬路,一場黎到梗係坐街邊感受吓地道風味啦!!

先黎一碟串燒(S$24 / 40串),有雞牛羊鴨4種肉,加多杯印度拉茶(S$1.5),好好味!!可惜係原本叫多咗兩碟餸,但等左好耐都未黎,只好放棄返酒店囉!!

呢日係五日行程中最多路行嘅一日,所以好早就訓覺囉!!