新加坡自由行之旅2011@Day 4

8月20日行程 : 新加坡動物園～Singapore Flyer

今日我地兩家分開玩,阿妹佢有佢地去東區果邊玩,我地食完早餐就出發去新加坡動物園!!

坐MRT由City Hall到Choa Chu Kang站,再轉927號巴士,全程約一個鐘車程,約11點半終於到達新加坡動物園門囗.

門囗有promotion做緊,有動物園加摩天輪套票賣,比分開買平幾蚊,有得平梗係速速俾錢啦!!

正式入場!!

一入場會先經過鱷魚池,條條都大隻過人,但又定咗格唔多識郁...

見差唔多時候,先去動物園内唯一嘅餐廳Ah Meng Restaurant(仲有間 KFC)食午餐,啲嘢食就好一般,阿女食兒童餐,我地兩個就印度嘢同喇沙!!

食野期間見出面圍住班人,八卦去睇睇,原來有人餵緊紅毛猩猩!!佢地搶嘢食好鬼搞笑!!

坐園内嘅循環巴士(可無限次坐),沿途可近距離見到各種動物!!比起幾年前泰國果個動物園,呢個好睇好多!!

輪到阿女入黎動物園嘅主打節目:Rainforest Kidzworld!!一早已經準備好泳衣,換好即刻衝入去玩囉!!

唔止小朋友,大人一樣可以入去玩架!!

毎次一有鈴鈴聲,所有人就會聚集於此,等大水桶倒水照頭淋!!

玩完水換好衫,再玩埋呢個飛索,夠哂皮!!

返去餐廳食個刨冰降吓温先!!阿女揀左美祿味,職員將舊冰磨到一片片,囗感有啲似雪糕!!去開動物園嘅朋友買杯試吓啦,好好味架!!(S$6.90)

再睇多陣動物,五點離開動物園囉!!

坐返巴士加MRT(沿途阿女都訓場覺差吓電,仲流口水流到我條褲濕哂...)返酒店放低野,會合埋阿妹,坐的士去Singapore Flyer!!

之前喺動物園買嘅package,阿女張入場券個職員俾咗張大人過我地,所以只需買多兩張小童一個大人,我地六口子就入得場啦!!(又慳返少少.)

可能因為係星期六,都幾多人.通過安檢,排咗接近九個字至上到車廂.

夜景真喺好蝦人影,加上玻璃反射,勉強得幾張見得吓人,見笑了!!

玩完摩天輪坐的士去試另一海南雞飯店:文東記!!感覺就好似太興咁,鷄同逸群差唔多,但個飯就真係好味!!

最後喺新加坡嘅一晩,呢日決定唔食杯麺,返酒店前去Raffles City食亞坤做宵夜.